عطش يسند عطش
وشفاف ذبلانه
او ريحة موت ظالم...
يمشي ويانه
واتهمهم اسباع ابسجن عرگانه
وقطار الموت مسدودات بيبانه
گام ادريول السچه ...
ينهب نهب گيعانه
الاصيل ايضل عظيم الشان
والطيبات عنوانه
نشامه اشما ايجور الوكت
متحزمين تلگانه
الشهم ما توجعه الصدمات
يكبت جمرة احزانه
اخ اشگد گصير الدرب ...
من شفنه السماوة اتريد ملگانه
ملح يسند ملح واتوسدينه الگاع
او تلگتنه السماوة ابگصه خجلانه
واجونه اهل السماوه ابزود ...
من فيض المحبه التجري بدمانه
ايدورون ابفراگين العشگ
هلبت (حسن) موجود ويانه
حته انخبر الدله الچبيره
اتفوح واتهلهل ابديوانه
وينچ يم (حسن) ..؟
كل الشلب گام اعله حيله ...
امتاني نيسانه
واجت سعده ...
ابخشلها او ليلة الدخله
اتناطر دفگة حصانه
وخجل باب المعسكر...
والتوت كل الدروب
ابسچه تعبانه
نخبرچ يم (حسن)
صوت الشعب ما مات
وبعدها اهل الچبايش
والغموگه امحزمه اويانه
وحگ ظيم الشعب والگاع...
يضل شامخ حزبنه
او تجري نهرانه
(حسن) هوحسن سريع
مرات القراءة: 2439 - التعليقات: 0
نقوم بارسال نشرة بريدية اخبارية اسبوعية الى بريدكم الالكتروني ،
يسرنا اشتراككم بالنشرة البريدية المنوعة. سوف تطلعون على احدث
المستجدات في الموقع ولن يفوتكم أي شيئ
قطار الموت
